ماذا يحدث في اسوان
اهل قريتين في اسوان "ابو الريش ودراو" بقالهم يومين بيعانوا من اعراض غريبة عبارة عن اسهال وغثيان وقيء وحرارة، اكتر من ٢٠٠ حالة استقبلتهم مستشفيات "المسلة والصداقة واسوان الجامعي ودراو المركزي" بنفس الاعراض وفيه كلام عن وفيات، وتم حجز ٦٣ حالة بالفعل والباقي مشوهم بعد وصف الادوية ليهم وفيه ١٦ حالة تانية استقرت حالاتهم وروحوهم "بناء على بيان وزارة الصحة".
ولان لحد دلوقتي محدش عارف ايه السبب واشمعنى المكانين دول بالذات، فالاعراض دي ممكن تكون بسبب اي حاجة :
- ممكن تكون ټسمم بسبب قرب الرشاح من محطة مياة الشرب.
- ممكن اعراض موسمية بتحصل كل صيف بسبب ارتفاع درجة الحرارة.
- ممكن تكون اعراض كوليرا بسبب كثرة الوافدين من السودان.
- ممكن يكون حاجة اكلوها في احتفالات المولد النبوي.
- اي حاجة حرفيا.
لحد دلوقتي محدش عارف فيه ايه او ايه سبب اللي حصل ده، اكبر اشاعة انتشرت هناك ان مية الشرب ملوثة، وخلت الاهالي يعتمدوا على المياة المعدنية، لكن وزارة الصحة نزلت بيان ونفت فيه ان تكون المياة مسممة لان كل قرية من الاتنين ليهم محطة مياة منفصلة، واكدت كمان ان مفيش اي تغير كيميائي او عضوي في العينات المسحوبة من مياة النيل.
اما بالنسبة لاحتمال ټسمم الطعام، فا قبل الحوار ده بيومين تحديدا يوم ١٦ سبتمبر الصبح فيه ١٢٤ حالة اشتباه في ټسمم اصابت سكان قرية وادي العرب في نصر النوبة في اسوان بسبب طبق فتة ملوث كلهم اكلوا منه او رز بلبن فاسد او حلويات ملوثة خلال الاحتفال بالمولد، وجالهم بردو اعراض مشابهة، لكن اغلبهم كانت حالات بسيطة وروحوا في نفس اليوم.
المحافظة بدورها عملت حملة عالاسواق والمطاعم والصيدليات وشمّع المحلات اللي مبتمتلكش شهادة صحية، واعدم ٦٥٠ كيلو اطعمة مجهولة المصدر، وعمل ١٦ محضر لحماية المستهلك، لكن تظل الحالات الجديدة بتاعت القريتين دي ملهاش اي تفسير، اشمعنى القريتين دول بالذات!؟
عامة لحد دلوقتي مفيش اي اجابة شافية، كلها دايرة اشاعات، كل اللي في ايدينا دلوقتي لحد ما الحقيقة تبان ان ربنا يسترها علينا وعلى اهلنا في اسوان، وربنا يعديها على خير.
منقول
